Áiay mobáelá Abdorrahmán Surizay benjuay sáz per at. Á gón táhiré hamé sázá gósh dáragá at o hameshiay tahá gár at. Sáz esh at:
“Byáet brátán, shawr bandén, may watan cha má hón lóthit.”
Áiay kashá neshtagén warnáéá Waytnámi gedár Jangay Gam (The Sorrow of War) dastá at o wánagá at. Dege warnáé gón mobáelá sar o poth at, máti lankoky shot borzá o atk jahlá. Hodá bezánt ché cháragá at. Áiá watá leptháp démá at o pa nebeshtah kanagá jédhagá at ke zenday máná ché bit kant. Á Sártaray gappá bemannit yá Kápkáay. Á “existentialism” o “nihilism”ay nyámá anchó mán gishetagat ke áiay delá é zenday gránterén sáhat at o endanáendá wahd óshtit o ázmán áiay sará kapit.
Asalá á modám anchó grán o sangin at o hamok chiz o sor o porán gón hirtiá cháragá at. Á harwad shiwár at o gón hirtchári o dirchári jédhagá at. É gappá á wat zánagá naat ke é tab áiá cha kasániá gón at yá cha darsgáh o sangatáni majles o diwánán dar bortagat, bale wahdé á jédhagá but godhá hayáláni zerá anchó gár but ke mardomán gosht wa bébaláhé nádráh ent.
Á hamé chortáni tahá gár at ke áiay chamm kóthiá thangetagén aksán kaptant. Kóthiay diwálay sará thangókén Hayrbaksh, Karimah, Golámahmad, Bálách, Agbar o Sájeday aks goshay rók róká áiá cháragá atant o áiá zenday bezántá sarpad kanagá atant. Áiá Karimahay chamm cháretant o gwastay moján gár but o delá hamé gapp áort:
“Retkagén hón mani máp tará sad randá
Proshtagén dhóké Bólánay tará máp nabit”
Kasé incho ham zemindóst bit kant? Kaséá gón dhéhá incho ham mehr bit kant ke wati retkagén hónán máp bekant bale dhéhay dhókéay táwán rasagá á hamincho dardig bebit o betawrity. É palsapahay démá wa Sártará ham goh wártag. Áiá was kot hamé rázá bepahmit bale bésób but.
Domi némagá Surizaiay benju sáz at.
Áiá kashá neshtagén warná cháret o ketábay tránagá kapt ke chón á jangámáchén mahlukay nyámá zendagi kanáná wati rájay bándátá porromét ent. Á hamá jangóláni tránagá kapt ke báligorábáni góndhalén tiráni neshánag bitagatant o pasht kaptagén chón ganók bitagatant. Dhéhesh anchó zadag o hoshkáwag bitagat ke hamok némagá jangá pad hónáni buán átár at. Kasé jangay tahá berán bitagat o kasé médhá pad. Áiay yát o máreshtán cha bésár bitagat.
Áiá gón wat kammo gelag kot ke Waytnámián wati jangáni kessah o sargwast chón labzánkay wasilahá mahlukay démá áortagant. Bale á ent ke anchó nábud ent ke jang, merag o koshag, jónáni buán, mátáni arsán, dhéh o dayáray abétkián chamme wat gendagá ent, bale eshán labzánkay wasilahá wati rájay démá áort kanagá naent. Zikén gappé ke say warnáay lásh mán shahray damkán dawr dayag bitagat. Áháni chamm cha kásagán dar atkagatant, pád o dastesh proshtag o jatk jatk atant o bálád dág dág atant o démesh gón tézápán sótkagatant o dertagén poccháni sará badetagén hónáni thapp záher atant.
Mátéá shahray chárráhay sará póstharé dastá at ke kaptag o béhósh at, goháré ke goháréay gamán chammáni arsy ham badetagatant. Dege bárén chincho kessah o kerdár atant ke esháni sará kágad o kalami káré bekant. Á lankokáni nákonán yakk yakká gón dantánán chondhagá lagget. Bázén chondhagán rand áiá samá but ke áiay chonki lankok hón ent. Asalá áiá hardé ke sakk jédhet godhá áiá wati lankokáni nákon anchó chondhetant ke dánke hón nabitant, yalahy nadátant.
Hamé damáná áiay mobáelá tawár kot. Áiá goshád goshádá mobáel chest kot o cháret. Áiá dist dán Sawgátay kolawé atkagat. Áiá anchó ke kolaw pach kot, kashá neshtagén warnáyá “adhay”é jat o gón kukár goshty:
"Adhay! Eslámábádá Balóchén mát o zahgáni sará bidh barag bitag o mardomesh latth o koth kotagant. Bázéné thappi ent o tostag o bázéné zendáná barag bitag."
Áiá wár naraset ke kolawá bwánit , pésará é tawáry góshán kapt. Áiá hamé warná cháret o gón wat jawadhagá lagget.
"Haw, godhá má abayde adhay o apsóz kanagá dege che zahm jat!"
Á hamé bárawá hayál kanán at. Drost shap o róch kóthiáni tahá neshtag o rasándaray tamáshái jódh bayagá ant. Drost wadárá ant ke kay barag o janag bit o kay latth o koth kanag bit. Padá á nendant, kammo apsóz warant o watá tasallá dayant. Padá esthaythasé janant o hamé wadárá bant ke kay kayá o chinchok mardomán áháni esthaythas cháretag.
Áiá bázén jédhagéá pad mobáel cháret ke sangatay kolawá wánán. Áiá ke kolaw pach kot, nebeshtah at:
"Yár, Tawkal chest kanag bitag..."
Tawkal áiay hamjomáeté at ke chotthián wati métagá shotagat. Hamé kolaway wánagá pad áiá mobáel kashá dawr dát. Áiay sará goshay ázmán kapt o áiá samá but ke áiay chammáni démá syáhié mán shánagá ent.
Á hoshk but o démay thangetagén aksán rók róká cháragá lagget. Hamé damáná Karimahay aks cha kiláyá dar atk o jahlá kapt. Gón aksay kapagá á pach larzet. Goshay záná áiá cha gránén wábéá bost kotagat. Á padá atk o aksy thanget o kashá dratkagén ádege aksán cháragá lagget. Padá mobáely kisagá kot, chádery baddhá kot o cha kóthiá dar atk.
Kóthiá hamá warná angat neshtagatant. Yakké ketábay wánagá delgósh at o domi mobáelá cháráná apsóz waragá at.
(2 agast 2025)
Ozayr Balóch