<!-- وپ:پَرَگرَپہ -->
پَدا پِر گَشتَگ اَنت شَپ ماہِکانی
پَدا یات اَتکَگ مَہرَنگێں دُنانی
<!-- /وپ:پَرَگرَپہ -->
<!-- وپ:پَرَگرَپہ -->
مَن زاناں گْوات چَما کُلّ ءَ شِگوَستَگ
دو رۆچ اِنت بُو اِنت ھیر ءُ پۆپَلانی
<!-- /وپ:پَرَگرَپہ -->
<!-- وپ:پَرَگرَپہ -->
سَر ءُ چَمّان اَنت آس ءُ اَنگَرێں چَمّ
کہ سَوگات اَنت بے وابێں شَپانی
<!-- /وپ:پَرَگرَپہ -->
<!-- وپ:پَرَگرَپہ -->
چِہ رۆچے کہ اَمُلّ پہ مَن دَر اَتکَگ
ھَبَر گیشێنتَگ ئِے گْرانماوَلانی
<!-- /وپ:پَرَگرَپہ -->
<!-- وپ:پَرَگرَپہ -->
اُمێت ءُ بے اُمێتی ھَرد دار اَنت
گُلێں گُپتار پُلّێں ھَمبَلانی
<!-- /وپ:پَرَگرَپہ -->
<!-- وپ:پَرَگرَپہ -->
مَتُرسێنِت مَن ءَ اَندۆہ ءُ رَنجاں
کہ بارُن کَشِّتَگ گْرانێں گَمانی
<!-- /وپ:پَرَگرَپہ -->
<!-- وپ:پَرَگرَپہ -->
مَنی اَرواہ ءِ رَپتاراں ھَزێنیت
گُلێں ھانُل کِہێب ءُ لُڈَّگانی
<!-- /وپ:پَرَگرَپہ -->
<!-- وپ:پَرَگرَپہ -->
تَئی آسکی دیدَگانی مِنَّتوار اَنت
مَنی بَہت ءُ سْیاہی کَنجَلانی
<!-- /وپ:پَرَگرَپہ -->
<!-- وپ:پَرَگرَپہ -->
مَنی نام ءَ گۆں ھَرکَسّا گِران اِنت
ھَسَدّ ءَ گێش کَنت جَورێں بَدانی
<!-- /وپ:پَرَگرَپہ -->
<!-- وپ:پَرَگرَپہ -->
دِل ءُ چَمّان ءَ راہ ءَ چێر گێجِت
سِپَہ پێداک اِنت دیوان ءُ سْرَپانی
<!-- /وپ:پَرَگرَپہ -->
<!-- وپ:پَرَگرَپہ -->
مَسیت ءَ ھَم نَزاناں کئے مَن ءَ بارت
تَئی بُرواں کہ مِہراب ءِ کَمانی
<!-- /وپ:پَرَگرَپہ -->
<!-- وپ:پَرَگرَپہ -->
بِچَر پہ اێمِنی سَبزێں بَہاراں
مَنی لَسّائیں آہُوگ بے دِہانی
<!-- /وپ:پَرَگرَپہ -->
<!-- وپ:پَرَگرَپہ -->
مَکَشّات پہ تَرا تْرُندێں لِوارے
زَردۆکێں مۆرت ءُ ٹیٹَل سَرشَپانی
<!-- /وپ:پَرَگرَپہ -->
<!-- وپ:پَرَگرَپہ -->
کُج ءَ آ شَہدگال ئے بے نَگێں لُنٹ
کُج ءَ اِے کَدَّہ شیر ءُ شَکَّلانی
<!-- /وپ:پَرَگرَپہ -->
<!-- وپ:پَرَگرَپہ -->
سَیَد آتار ءُ سارت اِنت گْوات زاناں
کہ گُل پێداک اِنت مِسک ءُ اَمبَرانی
<!-- /وپ:پَرَگرَپہ -->
<!-- وپ:پَرَگرَپہ -->
بُلۆرداں | کَسِرکَند
بے گاہ: 5 اَکتۆبَر 1954
سَیشَمبِہ
<!-- /وپ:پَرَگرَپہ -->
Sayad Háshomi