کُوکار مَچِّتَگ، شَمبُو نَچِّتَگ
بَروار اَتکَگ اَنت، ڈَلدێما نِشتَگ اَنت
گِداماں گۆں بَلۆچ، گۆں مێش ءُ بُزگَلاں
مَچرَنگ اِنت پَدا پێژناہ پۆگَس اَنت
ھامێن اِنت بْیا، ھامێن اِنت بْیا
ھامێں اِمبَر ءِ وَشّا وَشتِر اِنت
زِند ءِ مَچکَدَگ شَرّی ءَ بَر اِنت
ھال اِنت تَئی آیَگ ءِ!
گْوَنگێں مئے دِل ءَ نۆگَرکے جَتَگ
پُلّێں واہَگ ءِ مَچّ ما سُند کُتَگ
گْوَرشاں بَستَگ ءُ کُنگُو چَنڈِتَگ
مِہر ءِ بُرزَگ ءَ بَستَگ ما شَگَزّ
ھاکۆٹ ءَ دِل ءِ ناہُن دَر چِتَگ
ھامێن اِنت بْیا، ھامێن اِنت بْیا
ناہ گۆں شیرَگاں کُمبانی تَہا
ھارَگ گْراستَگ ءُ تاپ اَنت بُرزَگ ءَ
کَپُّو کاپَر ءِ چێر ءُ ساہِگ ءَ
گَرکُو، پاچِک ءُ ھُمبی ھینزَک ءَ
بَہر اِنت بْیا مَدَر دْراہێں مێتَگ ءَ
چانگال نُگرَہێں تالانی تَہا
ھامێن اِنت بْیا، ھامێن اِنت بْیا
پاتان اَنت شَلَگ، گۆنی ءَ ڈَلَگ
بْرِنج ماں گْوالَگ ءُ ھۆلُمب ماں لَچ ءَ
پاتاں ماں پَپُک، چَپشُک ماں کَچ ءَ
سُہبَت بْیا کَنێں، کُستی بْیا گِرێں
نازێنک ءُ سِپَت ھۆری ءَ جَنێں
مِہر ءِ مێتَگ ءَ، زِند ءِ کَلَّگ ءَ
ھامێن اِنت بْیا، ھامێن اِنت بْیا
گُلامُسێں شۆہاز
Golámosén Shóház