زْیادَہێں دَرد ءُ گێشتِرێں اوماں کُش اَنت
بَزَّگێں شَیہا ھانُل ءِ سۆزماں کُش اَنت
اَتکَگێں ڈُکّال ءَ نَکُت اێرجیگ ڈیل مَنی
ٹیٹَل ءِ ٹَہلانی مَن ءَ تُوپاں کُش اَنت
سۆہَوێں مُلا، زْیارَتی مُنجار ءُ پَکیر
گۆں وَتی مَندراں سَرجَمێں اِلماں کُش اَنت
گْوالَگ ءُ پاتاں وَہل کُت اَنت میرانی بَرُنک
بَزگَراں ھَلک ءِ مُشتَگێں جۆہاں کُش اَنت
گْواڈَگ ءُ پُلّانی تِلَہرَنگێں دْرۆشُم ءَ
کُرّ ءُ بے واکێں پانِگ ءُ باگپاں کُش اَنت
دَست نَرَسیت کہ جۆڈ کَنت زانت ءَ بے شَرَپ
کَسّے ءَ چَوہا، کَسّے ءَ گێگاں کُش اَنت
ھَرچ دَپار گاجێل اِنت دَپ ءَ وَشّێں وَردِن ءِ
کَپتَگێں مَرد ءَ رِتکَگێں دَنتاں کُش اَنت
گَلَّہ ءُ بْرِنج وَت نۆش کُت اَنت گێگے مِہتِراں
نانپَچاں ھۆرک ءُ ھالیگێں ھیراں کُش اَنت
جَمبَری شێنک ءِ واڈَہ ءُ اُستا گَل اَنت
ماں پَرتَگاں تَشّ ءُ ھَرَّگ ءُ سِنداں کُش اَنت
گْوانزَگی گَوگایاں نَزانتکارێں بَلُّک ءِ
بَندَگ ءُ مۆرت ءُ کُچَّلێں دَرماں کُش اَنت
گْوَشت کئے ءَ گْوَنگێں سَنگَت ءُ بْراتانا شۆہاز
مادَرێں ھَنکێن ءِ تَہ ئے زِنداں کُش اَنت
گُلامُسێں شۆہاز
Golámosén Shóház