جَمبَراں ماہ کُتَگ سَر ءِ بان ءَ
ھَور میسێنَگ ءَ اِنت گْیابان ءَ
آ شَپ ءِ کِسَّہ ءِ مَکَن جُست ءَ
آ شَپ ءَ مَردُمے مئے مِہمان اَت
اِشکُتَگ ما چَہ گُپتِ پیرێناں
ھۆنِ نَہَکّ گیپت اِنسان ءَ
کْوَہنێں دَستُونکے پہ تَو نۆک کَناں
یَبَّرے بْیا پَدا زِمِستان ءَ
ھَرکَس ءَ گۆں مَن ءَ دَگ ءَ کُرتَگ
اَلَّما کَپتَگ نُکس ءُ تاوان ءَ
کَمّزانتا کَدی سَرۆک مَکَن
کَمشَرَپ کَنت دْراہێں دیوان ءَ
چُش مَبیت ھَرکَسی دِل ءَ بُرَو ئے
اِے وَڈ ءَ ھَرکَسی مَکَپ جَنا
زِندَگی چۆ بَلۆچ ءِ پَدرێچ ءَ
ھَر چَہار نێمَگ ءَ پَرێشانا
ھَرکَس ءَ راستێں ھَبَر کُرتَگ
مُرتَگ اَنت یاکہ بَند اَنت زِندان ءَ
گُژن ءَ بے واب اَت اَنت گِس ءِ گْوَنڈُو
مات پہ چُنڈے نان ءَ ھَیران اَت
کَمّ سَر کَشّ گْوَست ءِ آدێنک ءَ
ھَمدِلێں راجے شاہی شاہان اَت
جَنگ ھَم چۆ مُنیر ئے شاِری ءَ
وَس کُتَگ گۆں مَن ءَ نَبیت مانا
پْرُشتَگَت باتِن ءَ تَئی اَبدال
زاہِری ءَ مُدام کَندان اَت
اِزَّت اَبدال
Ezzat Abdál