بْیا پَدا شَتکێں تَلارانی دِل ءَ دِرّاں کَنێں
گْرانبَہائیں دۆستی ءُ مِہر ءَ پَدا اَرزاں کَنێں
تَئی دوێں گالاں مَنی ناسَرپَدێں دِل گۆں جَتَگ
بْیا پَدا گالانی رَبّالَو زِری نۆداں کَنێں
مارا چَہ راہ ءَ گِسَر کُرتَگ اِے بے راہێں سَراں
اِے دِل ءِ ھۆناں چَہ، سُہرێں مادِنے رَنداں کَنێں
پُلّێں دیوَن ءُ مَراگاہانی کۆہێں ھاتِر ءَ
دَہسَری سُوت ءُ ھَزارگَنجێں نَپاں تاواں کَنێں
ماں تَرّ اَنت ھانُل ءُ مَہگُل اَگاں دێم ءَ مئے
مِنَّتانِش زُورێں بَندیگِش وَتی کَولاں کَنێں
دُور نَہ اِنت مِنزِل ھَزارگَنج ءُ ھَزارنازێں، سَیَد
ھَمبَلاں زُورێں چۆ کَور ءَ دُورسَرێں رُمباں کَنێں
بَہرِن
آدێنَگ ءِ سَباہ ءِ 5:20
20-اَپرێل-1956
سَیَد ھاشُمی
Sayad Háshomi