<!-- وپ:پَرَگرَپہ -->
میزّاں میزّانا مَنی واب ءُ ھَیالاں چَہ دَر آ
<!-- /وپ:پَرَگرَپہ -->
<!-- وپ:پَرَگرَپہ -->
دِل چَہ بَنداں تَئی اَندۆہ ءُ گَماں چۆ سِستَگ
کہ مَن دِل گْوَشتَگ بلے زْیادَگێں دْرُگے بَستَگ
اێشی ئے اُپّارَگاں سالے ءُ دو شَش ماہ گْوَستَگ
یَکّ دَمانے بیت کہ دَردانی دَوارجاہ تْرَہِتَگ
<!-- /وپ:پَرَگرَپہ -->
<!-- وپ:پَرَگرَپہ -->
مِنَّتوار آں تَئی اێشیا نی مَٹۆہێں پہ ھُدا
میزّاں میزّانا مَنی واب ءُ ھَیالاں چَہ دَر آ
<!-- /وپ:پَرَگرَپہ -->
<!-- وپ:پَرَگرَپہ -->
وَتی مَلگۆراں مَشِنگێں مَن ءَ بے سار مَکَن
شَہد ءُ وَشزێمِلێں گالاں گۆں وَتی گار مَکَن
واہَگ ءُ دۆستی ءَ مارا پَدا بیگار مَکَن
چۆ مَن ءَ تْرُند مَچار ءُ دِل ءَ واہدار مَکَن
<!-- /وپ:پَرَگرَپہ -->
<!-- وپ:پَرَگرَپہ -->
دَست بَنداں کہ چَما راہ ءَ بُرَو تَرّ پَدا
میزّاں میزّانا مَنی واب ءُ ھَیالاں چَہ دَر آ
<!-- /وپ:پَرَگرَپہ -->
<!-- وپ:پَرَگرَپہ -->
دۆتکَگ گۆنڈَلاں دِل ھۆش ءُ ھَیالانی بِزاں
تیرباراں کُتَگ مارتیناں شِگانانی مَناں
مُدَّتے پَتکَگ جَگَر اَنگَر ءُ سُہرێں آساں
ھُشک بات دُژمِن ءِ دَست اێر اَت تَئی زانسَراں
<!-- /وپ:پَرَگرَپہ -->
<!-- وپ:پَرَگرَپہ -->
دْرُست تَئی ھَمراہ اَنت نی ھِجبَر مَنی دُنیا ءَ مَیا
میزّاں میزّانا مَنی واہ ءُ ھَیالاں چَہ دَر آ
<!-- /وپ:پَرَگرَپہ -->
<!-- وپ:پَرَگرَپہ -->
بے ر ئِےائیں تَئی آ کَدَّہێں چَمّانی کَماں
ٹِکّ ئِے بَستَت پہ مَنی سێنَگ ءَ بے وَہد ءُ گُماں
تْرانَگ ءَ گْوَستَگێں پِرّێن اَنت مَن ءَ سَہت ءُ دَماں
تا اَبَد گار نَبَنت کاریگێں ٹَپّانی نِشاں
<!-- /وپ:پَرَگرَپہ -->
<!-- وپ:پَرَگرَپہ -->
دیدَگاں آسکی مَشاں دیدَگی سَوگِند اِنت تَرا
میزّاں میزّانا مَنی واب ءُ ھَیالاں چَہ دَر آ
<!-- /وپ:پَرَگرَپہ -->
<!-- وپ:پَرَگرَپہ -->
چۆ مَنی بَہتَئێگ ءَ شَپ پہ کَسے ءَ سْیاہ مَبات
کَسّی بالاد ءَ گَمانی چُشێں مُشکُل مَکَپات
گۆں تَو ھانُل مَنی اِے یَکّێں دْوا ھَمراہ بات
وَژدِلێں کُلّ تَئی دِلواہێں مُراداں گِندات
<!-- /وپ:پَرَگرَپہ -->
<!-- وپ:پَرَگرَپہ -->
زیر وَتی داتَگێں سَوگاتاں پہ وَشّی ءُ رَزا
میزّاں میزّانا مَنی واب ءُ ھَیالاں چَہ دَر آ
<!-- /وپ:پَرَگرَپہ -->
<!-- وپ:پَرَگرَپہ -->
<!-- /وپ:پَرَگرَپہ -->
<!-- وپ:پَرَگرَپہ -->
کَراچی
مارچ 1951
<!-- /وپ:پَرَگرَپہ -->
Sayad Háshomi